關島遊記 Part 2 - 2011.11.10

其實响馬尼拉機場是逗留兩小時, 但果兩小時真係十分忙, 唔係因為好多相要影而忙, 而係入美國境真係超煩!!!!!

首先, 我們要排隊响一個COUNTER度响張機票上面CHOP個TRANSFER的印, 然後又要排另一條隊, 俾人搜身......要將你身上的物品放在籃上, 包括你著緊果對鞋, 等照X-RAY, 而自己也要過金屬機, 而且仲要俾人搜身.....好啦, 仲以為攪惦啦, 點知, 臨上機,又要再搜身, 今次仲煩. 首先你要先將你身上的物品俾佢檢查, 我有個背包同手袋, 佢將我手袋及背包入面的野, 逐件逐件咁攞出來, 逐件逐件咁睇, 睇完又逐件逐件咁放番入去, 真係好嘥時間......唔好以為搜完行李就完成, 佢會將你的行李放响佢身後, 之後要俾另一個工作人員搜身, 首先要脫鞋, 佢睇完你對鞋又會放响另一個地方, 之後就俾佢搜身, 搜完之後, 你就要去攞番自己對鞋, 之後再攞番自己啲手袋......真係煩到震, 估唔到响馬尼拉, 一個機場內, 就要搜兩次身, 除兩次鞋.......美國, 你係未真係咁怕死呀???

終於可以上機啦, 晚上10:15由馬尼拉起飛, 坐4小時, 因為有2小時的時差, 所以去到關島是淩晨4點啦~~~~

去到關島, 攪好晒入境的手續, 有個CITY TOUR的領導帶我地遊覽幾個關島的景點.  首先佢帶咗我地去一個大型的超市: K MART, 因為關島的氣温平均有三十幾度, 只是一早一晚會比較清涼, 所以佢提議我地買多啲水, 以免中暑.

之後, 去第一個景點:關島自由女神像, 差不多天亮了, 可以見到日出, 真係好興奮, 關島的風境真係太美啦~~~

第二個景點: 阿布根瞭望台. 在瞭望台可以看到半個關島的景色, 不禁又要說句, "關島, 你真美呀~~~"
去到瞭望台, 一定要試椰青伯伯的椰青, 首先大家一邊欣賞關島的景色, 一邊飲椰青, 飲完後唔好掉, 攞番俾椰青伯伯, 佢會放啲wasabii响個椰子入面, 攪均再食啲椰子肉, 好好味, 有人話似三文魚刺生, 有人話似墨魚刺生, 清甜可口, 連我唔鐘意食椰子, 飲椰青的人都覺得好好味, 超讚!!!

第三個景點: 聖母瑪麗亞大教堂, 因為宗教的問題, 唔係好熟識, 不過都有入內參觀.

第四個景點: 戀人岬, 這是關島一個好著名的旅遊點, 是為了紀念一對悲慘的戀人.

完成這個景點, 大家就返酒店CHECK IN啦, 我同HONEY就要到關島的政府攪文件, 不過因為太多人, 成日早上都要响度等......辦完晒文件, 就同大家一起去食拉麵.  這間"藤一番"是旅遊書及網友推介, 都唔錯呀, 最值得一試再試的是餃子, 真係唔錯~~~

LUNCH之後就自由活動, 我同HONEY因為太累, 所以返酒店訓咗LU......
訓到食DINNER的時候, 去咗酒店附近的CAPPICCIOSA食, 都係旅遊書及網友推介, 尤其要試墨魚汁意粉, 基本上, 所有食物都唔錯呀, 飲品大部分都有得REFILL, 值得再試~~~~

這天的行程完畢啦~~~~~