2013.09.20 第14日

小豆丁出世了14天了, 而我就照顧了他6天了, 由初初的雞手鴨腳到現在已經熟習了不少. 不過偶然也會手足無措.

現在小豆丁的樣子跟出世時已經有很大的轉變了. 而他現在開始懂得扭計, 有時真的不明他扭什麼?又不停喊, 都有少火煩及令人忟.  但在媽媽的心目中, 他永遠都是最可愛, 最乖及最靚仔的小豆丁.

而我的身體都復原得七七八八了, 傷口已經冇痛了, 而且動作都比之前自如得多, 雖然還大不如前, 但都習慣了, 可以接受.  現在最想的是完全康復及快點坐完月, 那我就可以沖涼及洗頭了.  不能沖涼及洗頭真的令人十分痛苦呀! 昨日, 我終於忍不到, 去了髮型屋洗頭, 真的十分舒服, 真是没有想過能夠沖涼及洗頭是如此難以逹成.

現在我的肚腩仍然像有了4個月身孕一樣, 不知何時才能像以前一樣.

2013.09.17 第11日

小豆丁出世第11日了, 見他一天一天的長大, 心中真的很開心及安慰, 最重要是他健健康康, 開開心心.

今日, 真的十分好笑, 其實是自已太過大意.  小豆丁自回家後都十分扭計.  今天淩晨4時, 食完奶後開始不肯訓, 又開始扭計, 抱又喊, 剛食完奶, 冇理由會肚餓, 真的不明. 最後我再看清楚奶粉罐外的指示, 原來他現在食的奶粉是每3小時食一次, 我還跟著醫院的奶粉次數(4小時一次)給小豆丁食, 所以現在的他應該很肚餓, 哈哈, 我這個媽媽真的很大意.  現在已經調節了小豆丁的飲奶次數, 希望他今晚不要再扭計啦, 我真的好攰呀~~~

另外, 我最常做的事就是望著小豆丁, 其他任何事情都冇興趣再理了, 哈哈!!!

2013.09.16 第10日

跟小豆天相處了2天, 十分明白做媽媽的偉大及辛苦.  有時又怕不小心弄痛他, 有時又怕他唔舒服, 有時又怕他食不飽著不暖, 總之任何事都會擔心.

在第一天, 真的有點不知所措, 好在媽咪在家幫忙, 而最令我傷腦筋的是餵人奶.  可能我抱得他唔舒服, 起初小豆丁不肯食, 最後媽咪叫我堅持, 終於成功了.  不過現在的奶量不多, 要再補奶粉.  經過這2天的大戰後, 小豆丁終於找到自已舒適的位置來啜食, 希望明天會更好~~~~

2013.09.14 第8日

小豆丁出世第8日了, 經過在醫院休息的2日, 及在家休養的5日, 身體及精神都好咗好多.  其實在醫院休息的時間不多, 雖然全日都是食及訓, 但每隔一段時間就會有護士來為你量體温及血壓, 而且隔離床的BB, 會每隔一段時間進行一次交響樂, 所以都比較攰.

而回到家, 當然是最好的, 因為媽咪陪我坐月, 所以衣食住都不是問題, 可以安心休息.  而小豆丁因出世時吸了胎水, 所以醫生建議留院觀察及打7天抗生素.  雖然十分不捨得, 但醫院有醫生及護士照顧, 我都十分放心, 只是每天要到醫院探小豆丁及餵奶, 都不是十分辛苦.

明天小豆丁就可以出院了, 真的好開心及期待, 希望小豆丁會接受我這個媽媽啦~~~~

2013.09.07 - 40星期 : 小豆丁出世啦!!!!

昨日,從醫院回家,真的十分鐘意在家的感覺, 十分舒服, 尤其是家中的床, 哈哈.

早上六時許, 被陣痛弄醒, 我還以為要去便便, 在厠所內坐了一會, 最後才意會到應該是陣痛, 於是CALL的士往醫院了.  當時是平均每15分鐘痛一次.  其實, 那時我心裏都不太緊張, 因為聽其他人的經驗, 都是十分痛, 行路都不能, 又需要痛一整天, 所以我都是十分輕鬆.

由屯門到薄扶林的瑪麗醫院, 都要需時45分鐘, 而我的陣痛亦由每15分鐘一次, 到10分鐘, 再由10分鐘到5分鐘, 最後到3分鐘.  終於到逹醫院了, 馬上安排入院做檢查, 大約檢查了10分鐘左右, 護士竟然說我發緊燒, 而小豆丁的心跳亦比較快.  當時我的心情真的十分忐忑.  最後醫生親自向我解釋, 要我馬上入產房,準備迎接小豆丁的來臨.

去到產房, 醫生再講解多一次情況給我聽, 再提議用人手穿胎水,看看胎水是否正常.  穿了胎水後, 原來已經有很多胎糞了, 而且穿了胎水後, 小豆丁的心跳還未有改善, 最後要馬上入手術室剖腹生產了.  其實由到醫院登記到我入手術室, 前前後後都只是用了1個多小時, 根本没有時間容許我思前想後, 總之一切都交由醫生.

到逹手術室後, 才發覺手術室真的很大, 而且感覺十分先進, 令我感覺十分安全 (其實是自我安慰中, 哈).

首先, 護士在我的手背上插了黃豆針, 我想應該是用作吊鹽水及其他藥物罷.  而助產待再將我的身體屈成蝦米般, 然後, 麻醉師在我背部打了一針麻醉藥, 麻醉我的下半身.  之後麻醉師用一粒小冰粒滑過我的身體, 以確保麻醉藥有效.最後, 他們會吊起一塊綠色的布, 令我看不到自已的下半身, 以及看不到他們在做什麼.  只知過了一會, 護士說小豆丁快出來了, 之後就聽到喊聲了,感覺十分奇妙及開心!  之後,他們擦乾淨小豆丁, 會給我看小豆丁幾眼及對一些個人資料,再帶小豆丁給兒科醫生檢查, 而我的主診醫生繼續為我縫傷口.

手術完成後, 因為小豆丁吸了胎水, 要到加護病房給其他醫護人員照顧, 而我則躺在手術室外的休息室, 給醫務人員觀察.  大約逗留1小時許, 其間都只是休息, 訓吓醒吓, 及想想今天所發生的事.  麻醉師觀察及 血壓回復正常後, 就可以回病房休息了.

回到病房後, 大約2時許, 因為要準備一些住院用的個人物品, 所以醫院會要求家人拿我的個人物品到病房.  和陳生見面及交談後, 了解了小豆丁的情況, 平安無事, 都舒了一口氣. 因為做完手術, 都不能周圍郁動, 也不可以食東西, 只可以喝小量的水, 最後自已亦不知不覺地睡著了.

到了探病時間, 陳生, 媽咪及奶奶來了探我, 他們都十分擔心我的身體狀況.  其實在那時, 我才發覺自已真的十分大膽, 由入院到剖腹生產, 都是自已一個人, 那時都不懂得驚.

經過這驚險的一天, 精力跌到底點, 已經支持不住了, 早安~~~~

2013.09.06 - 39星期7日

昨晚,在醫院內睡得不好, 可能是陌生地方,而且,我的床是在走廊附近, 有點光, 難以入睡.  最後陣痛減少了, 所以我同醫生要求出院回家休息了.

2013.09.05 - 39星期6日

經過一晚的苦心思諒後,我決定不去私家醫院了,一來是不想浪費金錢,二來是覺得時間太緊迫, 都是一切等天意罷!

但今天早上開始有陣痛了, 每15分鐘痛一次, 心想,唔通小豆丁要出來嗎? 但次數並没有再加密, 最後去了瑪麗醫院待產.  到逹醫院後, 醫院馬上幫我檢查, 但現在還是十分早的生產階段, 醫生說都是要等,所以最後我在醫院住了一晚, 明天看情況再決定.  在晚上, 在醫院十分無聊, 只好玩生產球來打發時間.

2013.09.04 - 38 & 39 星期

今日小豆丁已經在我的肚裏39週5日了,真的十分期待他的來臨.  不明為何想他快點出世,雖然,大肚的感覺有好有唔好. 好的是去任何地方均有人讓坐,有優待. 但唔好的就是愈來愈辛苦,肚子愈來愈大, 走路時開始感覺大不如前,愈來愈慢, 而且開始有宮縮的反應, 行行吓要停一停. 而且肚皮十分痕癢,尤其在晚上, 已經不再光滑了, 不過我並不介意!

今日到了孫醫生那處檢查, 小豆丁已經重有7磅4了,雖然不是十分大隻, 其實6磅我都已經心滿意足了.  不過,有一個唔好的消息,令我及陳生都十分擔心.  孫醫生話小豆丁的頭仔雖然已經轉到在盤骨的位置,但仍然是高了點, 可以順產,但會十分辛苦, 而且生產時一定需要很長的時間.  真的十分擔心.  最後,我決定問孫醫生可否幫我剖腹生產.

孫醫生真的十分好人, 即刻幫我安排了9月7日早上8:30 在大圍的仁安醫院剖腹生產.  但我的心仍然很不安,最後跟家人商量完後, 各人都贊成, 就待明天覆孫醫生了.

2013.08.23 -36 & 37星期

好快就過了37週, 開始倒數了.  最後階段, 現在每星期都會到政府醫院及私家醫生檢查, 確保BB正常及安全地出世.

這個星期我的肚都係維持在40吋, 冇大過啦, 但就低咗好多, 可能是為了令BB更容易出世啦, 而我的體重己經到逹大約120磅, 與我未有BB時多了差不多30磅, HAHA, 感覺真的好特別, 冇諗過自己會變了120磅的人.

整體來說, 身體容易攰及眼訓, 可能個肚好重, 所以行一陣就想坐吓, 雙腳好容易攰, 不過而家要行多啲, 因為行多啲會令BB快啲出世架!  而個人會時常覺得好熱, 成日都會流汗, 行一陣就出汗, 在強大冷氣的商場是最舒服!  在這兩個星期, 轉變得最多就是睡眠的質素, 之前都訓得好好, 成日都會一覺訓到天光, 但這兩個星期開始, 個肚皮好痕, 而且每每都是在晚上痕, R到起晒粒粒紅晒, 醒咗又好難再訓番, 可能因為個肚太重, BB又會郁黎郁去, 所以成日都唔夠訓, 好攰.  最後個肚皮變咗成個地圖咁花.....真是有點不開心, 不過冇法啦,

在懷孕的後期, 我很多媽媽朋友, 情緒都不是太穩定, 成日都無端端或為了小事而喊, 我想因為荷爾蒙的影响, 而且太緊張BB啦, 所以準爸爸的角色真的十分重要.  好彩的是我這個情況不是太嚴重, 只是出現過一次, 不過一次都夠啦, HAHA~~~

今個星期, 我的私家醫生放假, 見不到BB, 只好留待下星期再見BB啦, 好期待呀~~~~~

2013.08.09 - 33 & 34 & 35 星期

話咁快就過咗35週了, 踏入最尾階段, 望返轉頭, 時間過得真的好快, 仲有1個月左右就可以見到肚入面的bb, 心情都有少少緊張同期待.  現在最常做的事就係倒數返工的日子, haha.

之前响健康院檢查, 每星期2次, 但到了35週開始, 每星期就1次, 而且還要返醫院檢查一次, 睇吓有冇咩特別情況, 或需要醫院繼續跟進, 如無需要會繼續返健康院每星期一次檢查, 直至bb出世為止.

其實健康院的檢查都不是十分仔細, 都是平常的量體重, 血壓以及摸肚.  之前, bb都未轉頭, 直至去到34週的時候, 睇孫醫生時, bb己經5磅5安士了, 但就睇到bb仍然未轉頭向下, 其實在這個階段, bb應該要轉頭, 真的有點擔心, 醫生話最壞的打算, 就是要開刀生bb, 因為bb未轉頭, 根本落唔到宫頸位, 就不能生產.  醫生還突登寫了封信給我, 叫我給醫院, 叫醫院幫我再仔細check一次.  到了8月9日, 返了醫院檢查, 醫生話bb摸了肚就話己經轉了頭, 我的心真的定了不少, 我都怕自己聽錯, 再三肯定, 醫生都好堅決話係轉咗頭, 不過只係未到宮頸位, 應該冇問題.  真係要講句Thanks God, haha~~~

最緊要一切順順利利呀~~~~

2013.07.20 - 30 & 31 & 32星期

話咁快就過咗3個星期, BB响肚裏面己經8個月啦, 不過個人真係懶咗好多, 好啦, 講吓這幾個星期有咩變化先啦~~~

首先講吓我現在的體重啦, 而家我己經有115磅啦, 我諗如果唔係有咗BB, 我的體重都唔會去到這個數字, 之前都唔夠95磅, 而家只是短短的32星期就多了20磅, 不過醫生話這是十分良好及正常, 不需要特別減少或增加食量, 而在7月11號去了孫醫生度做產檢, BB都有3磅13安士, 好正常, 好標準, 對我來說真的好開心及滿足啦~~~

而我條粗腰呢...唉, 而家己經粗到38吋啦, 差不多每星期粗大約半吋, 而家照鏡時, 覺得自己有啲似異型呀, HAHA!!!!不過最唔開心的係在肚下面, 發現了好多條紅色紋, 攪到個肚好似西瓜咁....搽咗野都好痕, 但又要忍住唔好"R", 怕會愈"R"愈多紋......希望生完BB後, 啲紋會自動消失啦~~~

這幾個星期, BB的郁動程度愈來愈密, 每半小時就郁一次, 又大力, 只是小了之前的大踢, 多數都是左右左右地郁, 可能BB的身體愈來愈大, 給他的活動範圍也愈來愈少, 所以他現在只可以左右郁.  我想每個媽媽到了這時, 會變了被虐待狂, BB愈大力, 郁得愈勁, 就算痛及辛苦都冇所謂, HAHA, 因為我就是這樣, 哈哈~~~

在接下來的8星期, 他會愈來愈大, 直至40週出來, 十分期待他的來臨.

2013.06.22 - 28 & 29 星期

已經7個月啦, 時間真係過得很快, 還有2個多月BB就出世啦!!!

在之前的7個月, BB的成長主要是各器官的發展, 所以體重及身型都是慢慢的增加, 但之後的2個多月, 以上的轉變會加快, 因為BB會開始長高及長肉, 所以在肚內的活動範圍也會愈來愈少! 在這個星期開始, 時常會感覺到BB的郁動, 而且郁動的時間多咗好多, 不論早上, 中午或晚上, 就連睡覺的時候都不停郁, 大約每半小時至一小時就會郁一段小時間.  之前並没有想像過自己會有BB, 現在見到自己身體上的變化, 及感覺到BB的郁動, 感覺真是十分興奮, 奇妙~~~

  

昨日, 因為好耐冇買過衫, 診有少少時間就SHOPING吓啦, 最後, 因為唔知買S 定買M size, 所以入了試身室試吓…..點知……當我試衫的時候,看見肉騰騰的自己…OMG, 即刻冇晒心機.  首先肚皮下方有好多青筋,而且真的好巨型, 有點難以接受, 而且PAT PAT同大脾都多咗好多肉! 還有2個幾月BB才出世, 我還要肥多2個幾月, 唔知到時我會變成點呢, HAHA, 不過最重要都係BB健康, 其餘的, 我都會暫時抛開, 等BB平安出世後再算!!!

2013.06.08 - 24 至27 星期

原來已經1個月冇寫BLOG啦, 一來自己懶咗, 二來今個月真係比較忙, 返工放工, 假期又要聽講座, 做瑜珈, 及GATHERING, 真係忙到想訓午睡的時間都好難找.  不過今個月好開心, 因為剛剛去完私家醫生度做產檢, 出來的結果真係好滿意, 好開心.

首先講吓個醫生先, 這個醫生不是我睇開的, 而是我所認識的媽媽會(全部媽媽的BB都是9月出生的), 其中一個媽媽推介的醫生!  孫醫生真是好好人, 而且好細心, 有咩問題都會耐心地解答, 又會十分詳細地解釋BB現在的情況, 真的好好!  首先講吓BB先啦, 27週的BB, 已經有2磅4啦, 醫生話BB十分健康, 屬於正常SIZE的BB, 而且比正常SIZE的BB大啲啲, 聽完醫生的分析, 真是十分開心, 因為媽媽成日都會怕BB營養唔夠, 又怕自己食的野不健康, 唔夠多, 聽到醫生的話真的安樂晒, 哈哈!

而我呢, 身形都冇乜變, 每個朋友見到我都話我冇咩改變, 冇特別肥, 現在肚圍就有35吋啦, 有時照鏡時, 見到自己的肚腩時, 真的覺得太不可思意, 同埋有點接受唔到, 因為好少會想過自己會變成這樣.  另外, 我覺得BB就吸我好多營養啦, 其中一樣是十分明顯, 就是我的皮膚.  像現在的天氣, 我除了面及肚皮, 其餘的皮膚都十分乾, 像冬天一樣, 而且, 以前我的手指甚少會生倒刺, 但現在會!  不過我不會介意, 而且還十分開心, 希望BB會繼續健健康康地成長啦~~~~

至於我的膳食方面, 我都為自己定了一些特定的餐單.  早餐方面, 我每天都會食芝士蛋三文治及一杯全脂的鮮奶, 其實這個餐單都有少少問題架, 首先, 芝士是十分有營養的, 又有大量的鈣質, 不過它略帶咸, 所以容易引起水腫, 所以遲多一段日子要減少食芝士的份量.  而全脂鮮奶營養都太多, 媽媽可能會肥, 但我見我飲全脂奶並没有肥太多, 所以都會繼續飲全脂, 如果後期真的肥太多, 就要轉高鈣低脂.  而午餐及晚餐, 都是平常的份量, 不過會注意, 揀一些健康及新鮮少少的食物, 而晚餐會比平常多少少蔬菜.  此外, 我額外加多了2餐, 就是下午茶及宵夜, 不過食的大多是生果, 有橙, 奇異果, 車厘子, 士多啤利, 雪梨等, 都是唔錯的選擇.  現在快到7個月的時候, 我還可以加糖水代替其中一餐生果餐, 現在開始可以食桑寄生蓮子蛋茶, 原來是可以幫BB清胎毒, 不過初時不可以食太多, 每星期一次, 如果身體没有不舒服, 可以每星期2次!!!  而我現在亦會間中食芝麻糊, 芝麻糊真的唔可以食太多, 這是懷孕後期的糖水之一, 所以每兩星期一次就OK, 不過我心急, 想BB頭髮靚啲多啲, 所以會間中偷食一次!

照舊, 每次都十分期待下次產檢再見到BB, BB, 你要加油, 快高長大呀~~~~

2013.05.11 - 22 & 23 星期

唔經唔覺, 己經去到22星期啦, 以醫學的計算方法, 4星期為一個月, 咁BB已經5個月啦, 現在肚子己經十分明顯啦, 坐車會有好心人讓坐, 與友人出街, 他們也會特別照顧...原來有BB都唔錯, HAHA~~~~

這兩個星期, 身體並没有大的變化, 人就胖了少許, 肚子就冇咩大到, 只是比上次更圓, 更漲, 肚臍開始被填平, 而行路的時候, 都開始要慢慢行, 不可以過急了!  上星期去了醫院做結構檢查, 大約等了15分鐘就到我啦, 其實都預咗政府醫院不會十分詳細同你說明.  首先, 佢照了腦跟頭, 一切正常, 有手有腳, 心跟胃都正常.  其餘的就不會多講啦, 但我問過其他媽媽, 原來在私家的話, 會幫你數埋手指及腳指, 也會講出BB的SIZE, 屬於大或細.  不過算啦, 總之一切正常我己經好滿足啦~~~~之後, 到了私家醫生做普通產檢, 亦是一切正常, 現在只希望一切都平平安安, 順順利利地讓BB出世!!!!

這個星期唔係好開心, 因為我加入了一個9月媽媽group, 內裏全是BB在9月出世的媽媽, 而其中一名媽媽在這個星期檢查出BB有少許問題, 要中止懷孕.....真係令人十分傷心及心痛...

2013.04.27 - 20 & 21星期

這兩星期真的完全完全過得非常開心, 除了可以大吃大喝外(當然有很多食物不可以食啦), 還時常感覺到"他"在肚裹左郁右郁, 感覺十分奇炒!!!

而家腰都是維持33吋, 冇大過, 不過個肚就圓咗好多, 原本只是肚腩的位置大, 跟著就是肚的兩則, 現在連胃至肚的位置都開始大起來, 原來有咗BB身體係會有咁的變化, 好奇妙呀~~~

現在坐車的時候, 己經開始很多好人讓位給我啦, 而剛剛的星期二到了健康院檢查, BB一切正常, 真的好開心, 希望BB快高長大啦~~~

2013.04.13 - 18 & 19星期

這兩個星期, 真的過得很開心, 首先己經感覺到BB在肚裏郁動.  而在晚上, 躺在床上的時候, 會感覺到他踢你, 感覺就像肚內的腸臑動, 但只是幅度大很多.  起初還以為自己FEEL錯, 所以叫陳生都試吓, 他會感覺到肚皮, 有一下一下的隆起, 感覺真的很興奮.

而食欲方面也開始大增, 每餐會比以前食多少少, 而且會常常覺得肚餓.  而衣著方面, 己經有很多衫都著不到, 所有內衣及內褲都要換一些俾孕婦或SIZE要有XL才可以著到, 而平常會著的LEGGINGS, 都要著XL.  現在腰圍己經有33吋, 而磅數都仍是100磅.  現在己看到肚子有明顥的隆起, 坐車時都開始有人讓位了.

2013.03.30 - 16 & 17星期

這兩個星期情況開始好好多, 己經没有嘔啦, 只係間中會有少少作嘔感覺, 但心情己經完全唔同.   而食欲都多了點, 而家早上在早餐前會食一個麵包, 而下午TEA TIME會食生果.

上次檢查, 我的體重己經到了100磅, 重了7磅左右, 但眼看都不是十分大的分別, 只是肚子己經明顯隆了起來, 腰圍就以前的24吋, 去到現在的32吋!

不過我的負面性格時常令我不安心, 因為要等到4月尾才到醫院檢查, 好像要等好耐, 又唔知BB近期的情況, 開始自己擔心起來......如果每星期都可以見佢一次就好啦, HAHA, 唔知其他準媽媽會唔會好似我咁呢???

2013.03.16 -15星期

今個星期都有嘔, 不過明顯好少少, 可能己經有少少習慣, 而且我晚餐多數會食粥, 所以嘔的次數不多, 都是嘔了一次. 希望下星期一次都唔嘔啦~~~

14號, 去了政府醫院及私家醫生檢查, 今次會知道上次唐氏宗合症的檢查結果, 幸好所以結果都是正常, 真的十分開心.  我現在十分明白為什麼人人都說 "養兒一百歲 長憂九十九", 因為由我知道有BB開始就己經十分擔心, 在頭3個月, 一停提醒自己事事小心.  過了3個月後, 還以為可以放鬆一點, 但又擔心檢查的結果.....養小朋友真的唔簡單, 現在, 我和陳生己經開始計劃BB之後的教育方案!

在今個星期最開心就是私家醫生的超聲波檢查, 今次可以清楚地見到BB己經生長成一個人仔啦, 真的想像不到自己的肚內有個人仔, 6個月後就當媽媽, 真的好興奮! 

2013.03.09 - 13 & 14 星期

這兩個星期情況真的有點反覆, 還以為嘔吐期過去, 點知又有幾日唔舒服.  兩星期還嘔了4次, 心情就像坐過山車一樣由山上滑下.  所有野都提唔起勁, 每日返到屋企就想坐响SOFA唔郁, 什麼都唔想做.

而身型方面就没有什麼大的變化, 只是肚子就突了少少出來, 如果穿上緊身衫就會見到.

2月26號, 去了政府醫院檢查, 第一次醫院檢查, 首先是量血壓及度高量體重, 之後就會見護士及抽血.  另外, 剛好我12週, 所以可以做唐氏綜合症篩查, 這個檢查只可以在11-13週內進行, 所以大家要記住, 唔好MISS咗個期.

2013.02.23 - 12 星期

今個星期, 作嘔的情況好咗好多, 己經不是時常會嘔吐, 只是嘔了一次, 而且現在都是大約晚上11點左右才開始唔舒服, 心情當然開心不少, 因為己經唔駛成日怕食得太多而作嘔, 當然都是不可以食得太多啦~~~希望作嘔期已經完啦!

情緒方面就有點唔穩定, 有時睇劇集, 只是少少的感動位就會不自覺流淚.  不過這是正常的, 只是不要情況太嚴重就OK!

而26號要到母嬰健康院檢查啦, 好期待呀~~~

2013.02.16 - 10 & 11 星期

己經11星期啦, 這兩個星期一共嘔咗4次, 每次都是晚上, 真係好唔開心架, 因為成日都好肚餓, 但又成日都想嘔, 真係好矛盾.....

在這兩星期我得出一個結論, 就是每天大約到了下午6點, 就開始有想嘔的感覺, 而且每晚臨訓前, 刷牙的時候都會因為忍唔到而嘔出來, 所以最後, 每天晚上食完晚飯後都盡量飲少少水, 唔可以飲得太多, 再休息一會就洗澡, 洗澡後立刻刷牙, 因為洗澡完的感覺是最舒服, 最能避免嘔吐!

而媽媽認識的朋友, 他的太太有了4個月身孕, 但就是因為有了BB而有抑鬱症的徵狀.  其實我發覺如果準媽媽在工作時的壓力很大, 而且又時常嘔吐, 是十分大機會會有抑鬱症.  因為嘔吐或作嘔都會令人十分唔開心, 不安, 而且影響食欲, 所以各位準爸爸真的要體諒準媽媽, 而且要開解準媽媽, 這只是一個過程!

不過其實我都算是幸運, 因為聽說有很多準媽媽是每餐的餐後都會嘔吐, 直至BB出生為止......真的太慘啦, 希望我過多幾星期唔會再作嘔及嘔吐啦~~~

2013.02.02 - 8 & 9 星期

已經2個月啦, 時間真是過得很快, 在這兩個星期同之前一樣都是成日作嘔, 感覺真的好辛苦, 有兩次真的嘔了出來, 其中一之真的好恐怖, 成面的微絲血管都爆晒, 成面都係紅點, 好像出疹咁....要幾天才退....而身型都没有太大改變, 跟之前一樣, 只是胸部大了少少.

而31號, 終於睇醫生啦, 馬醫生好好人, 而且好親切, 照了超聲波, BB而家大約2CM大, 仲聽埋BB的心跳聲, 果一刻真的好感動, 有點想喊.....不過而家仲係2個月, 都要好小心. 而下月的26號就到醫院檢查啦, 都十分期待.

2013.01.19 - 6 & 7星期

這兩個星期其實不是太好受, 首先, 真係好容易攰同眼訓, 做少少野就想休息, 冇咩心機返工, 時常想返屋企訓.  最慘就是成日都想嘔, 雖然只是想, 未有嘔出來, 但成日個胃都好唔舒服, 食野又唔敢食得多, 水也不敢飲, 怕返返吓工真係嘔出來.

而家已經開始要食維他命丸了, 1.惠氏的Materna, 2.係萬寧姐姐推介的DHA, 3.都係萬寧姐姐介紹的GNC鈣片.  不過食藥都有少少困難, 要分開幾次食, 因為真係好想嘔.  有時太辛苦, 真的冇辦法, 食少一兩歀.

至於體型就冇咩分別, 只係肚有少少突起, 都不是太覺眼, 但胸部就明顯大了, 也没有之前的腫痛.

現在的心情好奇怪, 因為時常都覺得好似發夢咁, 不相信自己真的有了BB, 真的好期待31號的產檢, 想時間過得快啲, 可以知道BB生長的進度.
(點解第一次產檢要等2個月? 因為要待2個月, 照超聲波才可以清楚照到BB, 所以只好等.....)

2012.01.07 - 5星期

昨日去完蒲台島, 今早起床十分攰, 而且今早淩晨時份又肚痛, 所以最後偷懶請了病假一天.

睡到9時許, 躺在床上想一想, 原來period已經遲咗差不多兩星期, 再想一想, 近期胸部也腫了不少, 有點唔舒服, 而肚子亦脹脹地......最後我決定買了一支電子驗孕捧.  在只是等待的3分鐘, 心情都有少少緊張, 唔知是自己心多, 還是真的.....最後, 3分鐘後, 結果出現啦, 原來已經有了5星期的身孕啦......當時心情真的好開心, 但又好擔心, 因為在這個時刻, 唔知可以做什麼或要做什麼!!!!

在我六神無主的時候, 想起近期都有了小朋友的姐妹們, 立即打電話給她們問問.....大家知道後都好開心, 及叫我立刻看醫生, 叫醫生寫張醫生的轉介信給我, 用來預約母嬰健康院, 及再預約一個私家的婦產科醫生.  最後預約了1月31日就到私家的醫生檢查, 而2月26日就到政府的母嬰健康院!!!

距離檢查還有3星期, 真的好期待呀~~~~

蒲台島遊記

上星期日和一班長輩到蒲台島行山, 但原來去那兒的渡輪班次十分疏, 如在香港仔, 每天只有一班船來回, 早上8:15開出, 而下午6:00在從蒲台島回來.  而另一個地點坐渡輪的地點就是赤柱, 但每天都是3班, 早上3班, 下午3班, 如果想去蒲台島玩的, 真的要留意一下渡輪的時間表.  

經過大約一小時船程, 就到達目的地蒲台島.  下船後, 沿路直行, 左邊有食店, 而右邊有條山路, 可以往山上行.  因為時間尚早, 所以我們往右邊, 向山上行.

沿途景色怡人, 大約15分鐘, 我們就到達第一個景點 --- 古代石刻.  這些圖案大部分都位於海邊的崖上, 推測這都是當時的居民出海時所刻畫, 用作祈求出海平安.

 

 

沿路一直走, 都是無敵的海景, 而山上亦有很多被命名的怪石, 首先是僧人石及靈龜上山石.

 

其實這張靈龜上山是拍錯的, 在山上我看了很久都找不到, 但回來看其他資料圖片時, 才發現原來要在遠處看過去才看到.

繼續往前走, 見到大少營友, 之後就到另一個景點 --- 佛手崖

 

 佛手崖, 真的很像一隻手

行完佛手崖就完成右邊的行程, 再在這上徑往上行, 就會去到蒲台島的最高點 --- 觀日亭

 

行到中段, 往後看, 覺得有點回到古代時的情景....

去到觀日亭, 再沿山路行就會返回碼頭. 回到碼頭, 見時間尚早, 再到左邊的天后廟行一行.

碼頭的左邊有幾間食店, 第一間是明記海鮮店酒家, 第二間是耀記食粥麵, 再繼續往左行就是天后廟.

往天后廟途中見到村民曬的咸魚

完成整個蒲台島的行程都差不多12點, 是時候食午餐, 最後我們決定在明記海鮮酒家食.

酥炸魷魚, 十分鮮味, 用新鮮的魷魚炸, 與在其他酒樓所食的十分不同, 味道口感都不一樣, 好好味的菜式.

炸子雞, 十分嫩滑

白酌蝦, 超正, 十分新鮮

蒜蓉蒸扇貝, 好好味呀

蒜蓉蒸桂花蚌, 十分新鮮, 正~~~

炒飯, 好味~~~

香菇斑腩, 正呀, 好好味

生炒骨, 都好好味, 不過骨就少啲, 啖啖都是肉








食完午餐, 離上船還有時間, 我們在碼頭附近再行行, 見到有間村民自己開的士多

之後還有一間糖水店, 最特別的是所以糖水都是用燒柴來煮的, 十分特別, 亦好好味~~~

最後我們坐3點的渡輪往赤柱.  總括, 週六週日去離島行吓山都是一個不錯的提議.